Նոր Audi A3․ է՛լ ավելի դինամիկ

Audi A3-ի չորրորդ սերունդը տպավորիչ կհայտարարի իր բնավորության մասին։ Կոմպակտ լիաքարշակ ավտոմեքենայի հիմքում առաջադիմական նորագույն տեխնոլոգիա է՝ էլեկտրահիդրավլիկ բազմասկավառակ կցորդիչ, որը կառավարվում է բոլոր չորս անիվները գործի դնող` հստակ կարգավորված ծրագրով։ Տվյալ տեխնոլոգիան ապահովում է առավելագույն կայունություն և կցորդում ճանապարհի հետ։ Զուգակցված ադապտիվ կախոցի և պրոգրեսիվ ղեկային կառավարման հետ՝ այն թելադրում է վարման սպորտային ոճ և երաշխավորում աներևակայելի տպավորություններ վարման ընթացքից։

Լիաքարշակ համակարգը բաշխում է ոլորող մոմենտը առջևի և հետևի առանցքների միջև։ Շարժիչի նորմալ աշխատանքի ժամանակ նրա հզորության մեծ մասը փոխանցվում է առջևի անիվներին։ Տեղից պոկվելիս կամ առջևի առանցքի փոքր քարշի դեպքում կցորդիչը կայծակնային արագությամբ տեղափոխում է ոլորող մոմենտը․ այս դեպքում միանում է էլեկտրական առանցքամխոցային պոմպը, որը մինչև 44 բար հիդրավլիկ ճնշում է մատուցում շղթայակցման թիթեղներին։ Որքան ավելի ուժեղ է պոմպը սեղմում կցորդիչի սկավառակին, այնքան ավելի մեծ ոլորող մոմենտ է փոխանցվում հետևի անիվներին․ մինչև 100 տոկոս։ Սպորտային վարման դեպքում ոլորող մոմենտի մի մասը դեռևս ղեկանվի դարձի ժամանակ կցորդիչի միջոցով կարող է փոխանցվել հետևի առանցքին։ Հենց վարորդը մեծացնում է արագությունը՝ Audi A3-ը կիպ սեղմվում է ճանապարհածածկույթին։ Բեռնվածքի փոփոխման ժամանակ ոլորող մոմենտի բաշխումն ապահովում է շրջադարձի ճշգրիտ անցումը, ինչն ավելի է բարձրացնում ընթացքի դինամիկան։

Եվս մեկ առավելություն է ոլորող մոմենտի ընտրողական վերահսկումը, որ իրականացվում է կուրսային կայունության ինտելեկտուալ համակարգի (ESC) միջոցով։ Բարձր արագությամբ ճանապարհի ոլորանը անցնելիս ծրագիրը թեթևակի արգելակում է ներքին անիվները։ Ձախ և աջ անիվներին տրվող քարշի ուժի տարբերության շնորհիվ առաջանում է ղեկակառավարման լրացուցիչ էֆեկտ, և ավտոմեքենան բառացիորեն «ներպտուտակվում է» ոլորանի մեջ։ Այսպիսի լուծումն ապահովում է առավել ճշգրիտ, սահուն և անվտանգ վարում։

ESC-ի երեք ֆունկցիոնալ ռեժիմները թույլ են տալիս ձևափոխել quattro լիաքարշ համակարգի կարգավորումները։ Այսպիսով, քարշը և դինամիկ կայունությունը կարող են շտկվել՝ կախված վարորդի նախասիրություններից։ ESC-ի ցանկացած միջամտություն ավտոմեքենայի կառավարմանը միշտ կատարվում է խնամքով և գործնականում աննկատ։ Հզորության առավելագույն փոխանցումն ապահովվում է ESC ON ռեժիմում։ Դա նշանակում է, որ արագացումն անվտանգ է, կայուն և կատարվում է հնարավոր ամենափոքր տեղապտույտով: Sport ռեժիմը թույլ է տալիս շփման ցածր գործակցով իրականացնել սահքը մակերևույթների վրայով (ինչպես օրինակ՝ ձյունը) ամենակառավարելի և անվտանգ կերպով։ Այդ դեպքում ինտենսիվ տեղապտույտը վարորդին թույլ կտա լրացուցիչ հաճույք ստանալ վարումից։ ESC OFF ռեժիմում անիվների տեղապտույտի ինտենսիվությունը գործնականում անսահմանափակ է, և վարորդը կարող է լիովին վայելել Audi A3-ի կառավարման սպորտային բնութագրերը։